Ginkondenar sang Alliance of Concerned Teachers (ACT) ang nagluntad nga shooting incident sa Banga National High School sa South Cotabato nga nagresulta sa pagkapatay kag pagkapilasan sang pila ka mga estudyante.
Sa interview sang Bombo Radyo kay Nebuchadnezar Catiempo Aller, Vice President sang Alliance of Concerned Teachers Region 6 Union-Capiz Division, iya ginpahayag nga indi dapat matabo ang amo nga insidente sa sulod sang eskwelahan nga ginakabig dapat nga isa ka luwas nga lugar para sa mga estudyante kag mga manunudlo.
Suno kay Aller, nagapakita ang insidente sang importansya sang pagpalig-on sang seguridad sa mga eskwelahan kag paghatag sang nagakaigo nga suporta sa mga estudyante, manunudlo kag school personnel agud malikawan ang pagbalik sang kaangay nga insidente.
Nagalaum man ang grupo nga mangin mas istrikto ang mga tikang para maprotektahan ang mga estudyante kag mga manunudlo, lakip na ang pagpatuman sang nagakaigo nga security measures kag psychosocial support sa mga naapektuhan sang insidente.
