Nagapati ang Alliance of Concerned Teachers (ACT) nga dapat manabat si Vice President Sara Duterte kon mapatud-an sa impeachment trial ang ginapahayag nga sayop nga paggamit sang confidential funds sang Office of the Vice President (OVP) kag Department of Education (DepEd).
Sa interview sang Bombo RAdyo kay ACT National Chairperson Ruby Bernardo, iya ginpahayag nga kinahanglan may salabton ang bisan sin-o nga opisyal nga mapanatud-an nga naggamit sang pondo sang gobyerno sa pamaagi nga nagalapas sa kasuguan ukon sa gintalana nga paggamit sini.
Sa testimonya sang anay COA state auditor nga si Roderick Wamil, iya ginsiling nga wala sang specific nga mga aktibidad sa physical kag financial plan sang DepEd nga makahatag sang igo nga basehan para sa pila ka paggamit sang confidential funds.
Samtang, suno man sa COA witness nga si Xylene Mae Del Campo, may pila ka transaksyon sa confidential funds nga nakita niya nga naglapas sa Joint Circular No. 2015-01.
DUgang pa sang natungdan, importante nga mapanabat ang mga opisyal kon mapatud-an nga may pag-abuso sa pondo sang katawhan, ilabi na nga ang confidential funds dapat gamiton lamang para sa mga aktibidad nga nagaangay sa mandato kag nagasunod sa yara nga mga patakaran sang gobyerno.
