ROXAS CITY – Nagalaom pa kuntani ang Provincial Jail Warden nga madugangan sang P20 ang subsistence allowance sang mga inmates sa Capiz Rehabilitation Center (CRC).
Apang, P10 lamang ang gin-aprubahan sa Sangguniang Panlalawigan sa appropriation ordinance nga nagapatuhoy diri.
Mahibaluan nga nagpadala sang sulat si Provincial Jail Warden Arjuna Yngcong kay Governor Esteban Evan ‘Nonoy’ Contreras nga gin-endorso man sang gobernador sa SP.
Sa amo nga sulat, ginahinyo ni Yngcong ang dugang nga P20 nga subsistence allowance sang mga preso apang bangud man sa kakulang sang pondo, P10 lamang ang gin-aprubahan sang konseho.
Mahibaluan nga kapin 11 na ka tuig nga wala gid madugangan ang pondo para sa mga preso sa nasambit nga pasilidad.
Gikan sa P45, mangin P55 na ang pondo kada adlaw sa kada preso para sa ila nga pagkaon.
Mahibaluan nga may yara sang masobra 200 ka mga Person’s Deprived of Liberty (PDL’s) ang yara karon nakahunong sa amo nga pasilidad.
