ROXAS CITY – Madamo sang mga leksyon nga natun-an ang isa ka manunudlo bilang Alternative Learning System (ALS) Mobile teacher.
Sa interview sang Bombo Radyo kay Francis Libardo, tumandok sang Tapaz kag anay ALS Teacher sa sulod sang masobra 15 ka tuig, nagapati ini nga para gid sa iya ang propesyon sa pagtudlo bangud nakita sini nga nangin instrumento siya para sa handom sang iya mga nangin estudyante.
Aminado ang manunudlo nga proud member sang LGBTQ+ nga kaangay sa nangin ‘happy go lucky’ ini sa una nga tatlo ka tuig nga iya pagtrabaho sa DepEd rason nga nag-abot sa punto nga diyutayan ini nga ma-terminate.
Apang, nahatagan siya sang kahigayunan nga tadlungon ang tiko nga dalan nga iya gin-agyan.
Bangud sini, ginkaya ni teacher Librando ang pila ka oras nga pagnilakat sa kabukiran sang Tapaz, wala sang kuryente kag signal sang telepono, mapadulongan lamang ang iya mga learners agud matudloan nga magbasa ukon magsulat.
Nagapati ini nga dako ang impact sang iya propesyon sa iya mga learner, bangud sang damlag lang may isa ini ka estudyante nga katapo na sang Philippine Army.
Sa karon, wala nagatudlo sa field si Libandro bangud isa na ini ka ALS Education Program Specialist II sang DepEd Capiz Division.
