Kasado na ang alyansa sang Partido Federal sang Pilipinas (PFP) ni Pangulong Ferdinand Marcos Jr., sa Nacionalista Party (NP) ni anay Senador Manny Villar para sa palaabuton nga 2025 elections.
Mahibaluan nga ginsaksihan ni Pangulong Marcos ang pagpirma sa alyansa subong nga adlaw.
Yara ang presensya sa amu nga aktibidad nanday NP chairman kag anay Senate President Villar, Sen. Cynthia Villar, Senador Mark Villar kag Deputy Speaker Camille Villar, subong man ang NP governors kag mayors.
Ini na ang ika-apat nga dako nga partido sa politika nga nakig-alyansa sa PFP sunod sa Lakas-CMD, Nationalist People’s Coalition (NPC) kag National Unity Party (NUP).
Suno kay Pangulong Marcos, magluwas sa pagpreparar sa midterm elections importante ang pagpakig-isa sang mga lider para sa kaluwasan sang mga Pilipino.
Tinutuyo suno diri sang mga partido nga pabaskugon ang pundasyon sang pungsod para sa kaayuhan sang tanan.
Samtang, ginsiling naman ni NP National Director Senador Mark Villar nga ang nasambit nga alyansa bilang pagsuporta sa reform agenda sang administrasyong Marcos, sa demokrasya, social justice, reporma kag pagpa-umwad.
