PRESIDENT ROXAS, CAPIZ- Ginpanginwala ni Manuel ‘alyas Kama-Kama’ Delfin ang mga alegasyon nga ginahaboy batuk sa iya natuhoy sa pagpangtunto sang pila ka mga indibidwal sa Barotac Viejo, Iloilo.
Sa interview sang Bombo Radyo, ginsiling ni alyas ‘Kama-Kama’, nga luyag niya lang kuntani nga makabulig sa mga tawo sa pagproseso sang ila nga mga lisensysa kag prangkisa sa motor.
Suno kay alyas ‘Kama-Kama’, indi siya sang fixer, indi man siya sang katapo sang LTO apang nagabulig lang ini siya sa tawo pamaagi sa pag-facilitate.
Pahayag niya, may nagakabaton siya nga kwarta bangud nga may nagahatag man sa iya, kag sa tion nga magpadulong ini sa talatapan sang LTO, ginadala niya man ang iya nga mga kliyente.
Madumduman nga naglapta online ang reklamo sang nabiktima ni alyas “Kama-kama” kun sa diin ginpromisahan nga mangin madasig ang pagproseso sang lisensya kun sa diin indi na mag-agi pa sa pagkuha sang student permit kundi magaderitso na sa professional license pinaagi sa ginapahayag “Bulig Motorista Program”.
Ginhangkat pa sini ang tawo nga yara sa likod sang nagpost nga impormasyon nga kun matuod isa siya sa mga nabiktima mas maayo nga magpasaka ini sang kaso batuk sa iya kag handa siya suno diri nga atubangon ini.
Nagapangayo naman sang pasaylo ang natungdan sa alkalde sang President Roxas, Capiz bangud sa ginapahayag paggamit sa iya nga pangalan.
Interviewed by Bombo Sunnie Mae Constantino Batencila
