Sa pagsulod sang bag-ong tuig, preparado na si Creamline team captain Alyssa Valdez nga buligan ang iya team nga maagom ang ginahandom nga ika-11 nga korona sa Premier Volleyball League (PVL) All-Filipino Conference.
Mahibalun nga medyo indi nangin maayo ang tuig 2024 para kay Valdez nga nagpaidalom sa pila ka bulan nga rehabilitasyon rason nga wala ini makit-an sa pila ka conference.
Gani kadungan sa pagbalik sang maayo nga kundisyon sini, nagpromisa si Valdez nga himuon sini ang tanan agud makabulig sa Cool Smashers.
Apisar wala pa sa perkpekto nga kundisyon si Valdez apang preparado ini nga liwat magratsada sa tion nga kinahanglan ini sa sulod sang court.
Nagalaum si Valdez nga mas mangin healthy ini sa tuig 2025 subong man ang iya mga teammates agud mas labi pa nga mangin matunok ang ila nga tropa sa mga masunod nga hampang sini.
Handom ni Valdez nga wala na sang mag-angkon pa sang injury indi lamang sa Creamline kundi mangin sa tanan nga teams nga yara sa PVL kag sa tanan nga atleta nga Pilipino sa kabug-usan.
Solido ang lineup sang Cool Smashers bangud madamo ini sang bala sa outside hitter position, nga amu ang posisyon ni Valdez.
Pila na diri sanday MVPs Tots Carlos, Jema Galanza kag Michele Gumabao nga masaligan sa team.
Handa na si Valdez nga magbulig sa oras nga kinahanglanon ini sa court ilabi pa nga sanay ini sa mga krusyal nga tion sang hampang.
