Patay ang 42-anyos nga mister matapos utason ang kabuhi pinaagi sa pagluthang sa kaugalingon sa Sitio Insiwala, Barangay Tapulang, Maayon, Capiz.
Sandig sa imbestigasyon sang Maayon Municipal Police Station nga gikan ang biktima sa banwa sang Mambusao kag yara sa impluwensiya sang makahulubog nga ilimnon sang nagpauli sa ila puluy-an.
Nakaangkon sila sang indi pag-intiendihanay sang asawa sa diin bangud natabuan nga nabasa ini sang ulan, nagsulod sa ila hulot ang biktima.
Pagkaligad sang pila ka minuto nabatian sang ginang ang lupok sang armas, rason nga iya ginsulod sa kuwarto ang bana kag ginkuha ang 12 gauge shotgun.
Ginbayaan sang ginang sa kuwarto ang biktima para pakan-on ang anak, apang nakita sini nga liwat ginauyatan sang bana ang armas.
Sa pagkabalaka sang ginang gindala sini sa kaingud balay ang ila anak, apang wala nadugayan nakabati sila sang lupok kag sang iya balikan ang balay sarado ang pirtahan rason nga nagpangayo ini sang bulig para mabuksan.
Amo na lamang ang kakibot sang ginang sang makita sini ang duguon nga bana nga gilayon gindala sa ospital, apang gindeklara nga dead on arrival sang doktor.
Sa karon yara na sa isa ka punerarya sa banwa sang Maayon ang bangkay sang biktima.
