SIGMA, CAPIZ – Arestado ang isa ka mister kaupod sini ang iya menor de edad nga bata sa ginkasa nga drug buybust operation sa Barangay Amaga, Sigma, Capiz.
Ginkilala ang nadakpan kay alyas Ariel kag ang kaupod sini nga anak nga nagapang-edaron sang 11-anyos nga mga residente sang Brgy. Timpas, banwa sang Panit-an.
Sa inisyal nga impormasyon nga nakuha sang Bombo Radyo sa Sigma PNP, nakuha sa paghinakop sang suspek ang walo (8) tanan ka sachets sang ginapatihan nga shabu kag isa ka wallet nga nagaduag itom.
Nahibaluan nga isa man ka drug surenderee si alyas Ariel kag nalakip man sa listahan sang BADAC sa ila barangay.
Magapangatubang sang kaso nga paglapas sa RA 9165 ukon Comprehensive Dangerous Drugs Act of 2002 ang nasambit nga suspek.
Sa karon, yara na ini sa karsel sang Sigma Municipal Police Station para sa nagakaigo nga disposisyon.
