ROXAS CITY – Patay ang 40-anyos nga amay matapos nga makuryente samtang nagakaayo sang extension wire sa ila balay sa Andrada Subdivision, Barangay Banica, sining syudad.
Nag-angkon sang paso sa dughan, ulo kag tudlo ang biktima nga si Onie Famundo sang nasambit nga lugar.
Sa pagpakig-angut sang Bombo Radyo kay Mrs. Remie Famundo, asawa sang biktima, ginpahayag sini nga yara ini sa banyo sang nabatian ang tingog sang bana nga kasubong nasakitan.
Sa iya nga pagguha nakita sang ginang nga natumba ang iya nga bana.
Ginakaayo sang biktima ang extension wire sang hinali ini nga makuryente.
Nahibaluan nga napaslawan ang biktima nga i-off ang main switch.
Gindala pa ini sa Roxas Memorial Provincial Hospital, apang gindeklara nga dead on arrival sang doktor.
