ROXAS CITY – Nakahunong na sa karsel sang Pontevedra Municipal Police Station ang amay nga nagbuno-patay sa kaugalingon nga anak sa Sitio Esperanza, Barangay Binuntucan, Pontevedra, Capiz kagab-i.
Sa pagpakig-angut sang Bombo Radyo Roxas kay Police Staff Sergeant Donabel Javero, Public Information Officer sang Pontevedra PNP nagaguwa sa imbestigasyon nga hubog nga nagpauli sa ila balay ang biktima nga si Sunny Boy Demo 21-anyos, 1st year college student sa kurso nga agriculture sa diin pagsulod sa iya hulot nagwaras kag sa wala mahibaluan nga rason hinali ginpanghampak sang tubo ang nagakatulog nga amay nga si Nestor Demo kag isa ka utod.
Wala sang nahimo ang pagsaway sang iloy sang biktima bangud nagpadayon si Sunny Boy sa iya ginahimo.
Bangud namulag mulagan ang amay nga si Nestor, hinali sini nga ginkuha ang kutsilyo kasunod ang pagbuno sa anak sa dughan kag paa.
Ulihi na lamang nakamarasmas ang suspek nga amay sa iya nahimo sang nakita na sini ang duguon nga lawas sang anak.
Suno kay Javero nga ba-se sa pagpangusisa sa suspek, wala sang natabo nga pag-akig sa biktima nga posible mangin rason para magpanglampus sang tubo.
Ginapanindugan sini nga ginaprotektahan lamang sini ang iya pamilya kag gindepensahan ang kaugalingon.
Nahibaluan nga matapos nakamarasmas sa nahimo nga krimen, boluntaryo ini nga nagsungka sa kapulisan.
Samtang wala na sang plano ang pamilya sang biktima nga magpasaka sang panumbungon batuk sa amay nga suspek, bangud nagapati sila nga gindepensahan lamang sini ang iya kaugalingon.
