ROXAS CITY – Ginhimo nga inspirasyon sang isa ka estudyante ang amay sini nga Person with Disability (PWD), agud lab-uton ang handum nga makatapos sa iya pag-eskwela.
Sa interview sang Bombo Radyo kay Ms. Hannah Joy Daynolo nagradwar bilang Suma Cumlaude sa kurso nga Bachelor of Science in Social Work sa Filamer Christian University (FCU), ginpahayag sini nga wala sang imposible sa tanan nga butang ilabi na kun dako kag hugot ang pagsalig sa mahal nga makaako.
Sa luyag nga makabulig sa isigkapareho, gindungan sini ang iya oras sa pagtuon samtang nag-volunteer sa Gawad Kalinga kag bilang fire volunteer.
Suno diri, indi ini nangin mabudlay sa iya bangud nagapati ini nga kun masadya kag luyag mu ang imu nga ginahimo sarang ini nga mahatagan sang oras kag pamaagi.
Mahibaluan nga tumandok si Daynolo sang Barangay Dinginan sining syudad.
Sa karun, plano sini nga magkuha sang board exam agud makatudlo sa mga estudyante nga nagakuha sang kaangay niya nga kurso sa unibersidad nga iya gintapusan.
Mensahe sini sa mga estudyante nga indi madulaan sang paglaum kag updan ini sang pagpangamuyo kag pagtimakas agud malab-ot ang handum sa kabuhi.
