ROXAS CITY – Patay ang isa ka amay, matapos nga ginbuno sang nakaba-is sang iya bata sa isa ka binaylehan sa Barangay Maindang, Cuartero, Capiz.
Ginkilala ang biktima kay Jun-nirey Eslabon, tricycle driver kag residente sang nasambit nga lugar.
Sa impormasyon nga nakuha sang Bombo Radyo sa Cuartero Municipal Police Station, ginapahayag nga nagalakat na pauli ang biktima kaupod ang iya bata nga si John Dexter sang nakit-an nila ang wala makilan-an nga lalaki nga amo ang suspek sa krimen.
Dugang sini nga ginkompronta sang bata sang biktima ang suspek bangud suno sa iya, ginatulok siya sini sang malain sa sulod sang binaylehan nga ila ginhalinan.
Nagbaisay ang duha kag diri nagpatunga ang amay ni John dexter agud pakalmahon ang magtimbang nga bahin, apang sa baylo nga magpati, wala nagpapugong ang duha tubtob nga ginbuno sang suspek ang amay ni John dexter sa iya nga tiyan kag madasig ini nga nagpalagyo.
Ginpadangat naman sa ospital ang biktima apang makaligad lamang ang pila ka oras, ginbawian ini sang kabuhi bangud sa iya patal nga pilas nga naangkon.
Sa karon, padayon pa nga gina-ayam sang mga kapulisan ang suspek matapos ang ginkomiter nga krimen.
