ROXAS CITY – Nagparekord sa Roxas City Police Station ang isa ka 48-anyos nga amay matapos nga ginaalegar may yara ini sang ginauyatan nga kopya sang CCTV footage sa pagluthang patay sa iya sini anak sa Bayot Drive, Barangay IX, Roxas City.
Suno kay Edwardo Rolio nga may ginhatag sa ila nga CCTV footage si Arnel Andaya sang amo man nga barangay.
Bangud diri, ginpakamaayo ni Edwardo nga ipalab-ot sa mga kapulisan ang impormasyon agud mapadasig ang imbestigasyon sa pagtumod sa suspek nga nagluthang-patay sa iya anak nga si Edward Rolio alyas Buldog.
Matandaan nga samtang nagainom ang biktima kaupod ang iya barkada nagdesisyon si alyas Bulldog kaupod ang abyan sini nga magbakal sang barbecue sa Roxas Avenue.
Pabalik na sila kuntani sang nagdesisyon nga magpangihi ang biktima apang hinali na lamang ini gintiro sang wala matumod nga persona nga sakay sa motorsiklo.
Narekober sa ginluntaran sang insidente ang lima ka mga empty shells sang .45 kalibre nga armas kag duha ka mga fired slugs sang amo man nga armas luthang.
Padayon naman ang hot pursuit operation sang mga kapulisan agud matumod ang suspek nga responsable sa krimen.
