ROXAS CITY – Nagapanawagan ang amay sang dalaga nga ginsumbag sang isa ka lalaki nga ginapahayag may deperensya sa paminsaron sa banwa sang Panitan sa pamilya subong man sa ila barangay official nga kun tani hatagan ini sang pagtamud.
Sa interview sang Bombo Radyo kay Tatay Roman amay sang ginsumbag ginpahayag sini nga masakit para sa iya nga sakiton sang iban nga tawo ang iya bata nga babaye ilabi na nga may yara ini sang balatian.
Suno diri, natabo ang insidente sang nagpadulong sa piryahan ang iya duha ka bata nga babaye apang pag-abot sa lugar dako ang kakibot sang dalaga nga naglagubo na lamang ang iya likod.
Bangud sa kahadlok gilayon nga nagpauli ang mag-utod kag ginpahibalo sa ila amay ang natabo.
Ginapahayag nga ang amu nga lalaki ang ginabulubanta 28-anyos ang edad kag residente sang Barangay Intampilan sa amu nga banwa.
Mahibaluan nga madamo na nga beses ini nagapanakit sang tawo ilabi na sa mga kababainhan.
Panawagan ni Tatay Roman sa pamilya nga kun tani indi nila pagpabay-an nga naganilakat sa dalan ang ila bata bangud indi tanan nga tawo ang nakakilala diri kag nakaintindi sa iya.
