Natabunan sang orange haze ukon orange nga aso ang pila ka bahin sang Estados Unidos bangud sang ginatos ka mga sunog sa Canada.
Bangud sini, ginpaandaman sang mga awtoridad ang publiko nga magpabilin sa sulod sang balay, labi na ang mga may balatian sa baga kag tagipusuon, mga tigulang, kag mga nagabusong nga babayi.
Sa Detroit, ginrekord ang pinakamalain nga kalidad sang hangin sa kalibutan, samtang apektado man ang mga estado sang Minnesota, Michigan, Illinois, kag Ohio, pati ang Ontario sa Canada.
Ginalauman sang mga opisyal nga magapadayon pa ang malain nga kalidad sang hangin sa bug-os nga adlaw, gani ginapanawagan ang publiko nga limitahan ang paggwa kon indi man lamang kinahanglang.
Samtang, ang gobyerno sang Canada nagreport sang 858 ka aktibo nga sunog sa bug-os nga pungsod, nga may 111 nga wala pa makontrol. Ang mga probinsya sang Manitoba, Saskatchewan, kag Ontario amo ang pinaka apektado.
