Nagapabilin nga curious ang mga Amerikano sa kun ano ang mga masunod nga tikang sang tagsa ka mga lider sang pungsod may kaangtanan sa Russia-Ukraine War, matapos ang Alaska Summit 2025 sang Sabado, Agosto 16, 2025.

Sa interview sang Bombo Radyo kay Bombo Nilo Juaniza, International Correspondent sa Estados Unidos, iya ginpakigbahin nga madamo sang mga amerikano ang luyag nga mausisa ang nangin resulta sang ginpatigayon nga Alaska Summit 2025 nanday US President Donald Trump kag Russian President Vladimir Putin.

Dugang pa sini, matapos ang nasambit nga pagsinapol sang amo nga mga lider, madamo sang mga tawo ang nagpabutyag man sang nagkalain-lain nga mga opinyon bangud sa nagtakop ini nga wala nalab-ot ang katuyuan nga makahimo sang kasugtanan sa pag-untat sang gyera sa tunga sang Russia kag Ukraine.

Nahibaluan nga sa nasambit nga Alaska Summit 2025, wala sa gihapon maganyat si Putin nga makig-ayos sa Ukraine apang ginkabig ini nila nga isa ka ‘extremely productive’ nga pagsinapol.

Natalana naman nga magpadulong si Presidente Volodymyr Zelenskyy sang Ukraine sa Washington DC sa adlaw sang Lunes, Agosto 18 agud nga makighinun-anon kay Presidente Donald Trump para sa mga masunod nga mga tikang angut sa nasambit nga isyu.

Pahayag pa ni Juaniza, may posibiladad nga ang katuyuan sang pagpakighinun-anon ni Zelenskyy kay Trump amo ang magtukod sang panibag-o nga mga tikang agud mas maganyat si Putin nga i-untat na ang kinagamo.

In an interview with Bombo Francis Biñas and Bombo Sunnie Mae Batencila