Nagapati ang isa ka abogado nga ang mga former Chief Justice sang Supreme Court may daku nga kontribusyon sa paghatag sang legal nga interpretasyon sa mga layi kag probisyon sang Konstitusyon.
Sa interview sang Bombo Radyo kay Atty. Rodel Taton, Dean sang Graduate School of Law sang San Sebastian College–Recoletos sa Manila, iya ginpahayag nga importante ang mga legal nga opinyon sang mga anay Chief Justice sa paggiya sa Senate Impeachment Court.
Suno kay Taton, ang pag-apelar sang Amici Curiae ukon mga eksperto sa legal nga mga butang isa ka pamaagi agud makabulig sa mga senador sa paghangop sang mga isyu sa impeachment case.
Lakip sa ginatalakay amo ang pag-interpretar sa 2/3 voting requirement.
Ginpahayag sang natungdan nga ang mga Amici Curiae nagahatag sang legal nga giya sa mga senador nga nagapungko bilang mga senador-judges sa impeachment court.
