Ginsapubliko sang Anti-Money Laundering Council (AMLC) nga may 630 ka covered transactions kag 33 ka suspicious transactions nga naglab-ot sa P6.7 billion si Vice President Sara Duterte kag sa iya bana nga si Atty. Manases Carpio.
Suno sa AMLC, P4.4 billion ang nagsulod sa ila accounts, P1.5 billion ang naggwa, kag P791 million ang wala ginbuyagyag nga inflow ukon outflow.
Ginpahayag sang pila ka mga mamalidha nga ang dalagku nga mga transaksyon ang wala nagasanto sa Statement of Assets, Liabilities, and Net Worth (SALN) ni Duterte, nga wala nagdeklara sang anuman nga cash ukon bank deposits halin 2019 tubtob 2024.
Gin-athag sang AMLC nga ang mga covered transactions ang may mga deposito nga nagasobra sa P500,000 samtang ang suspicious transactions ang nakitaan sang red flags ukon posible nga may kaangtanan sa ilegal nga aktibidad.
Padayon ang imbestigasyon sang AMLC sa mga transactions bilang kabahin sang ila financial monitoring kag review sang mga posible nga mga iregularidad.
