Patay ang isa nga lalaki matapos ginbuno sang iya kaugalingon nga amay sa ila puluy-an sa Purok II, Barangay Mangoso, Sigma, Capiz.
Ang biktima amo si alias Rey, 43-anyos, samtang ang suspek amo ang iya amay nga si alias Naldo, 77-anyos, Person with Disability kag lunsay residente sang nasambit nga lugar.
Sa interview sang Bombo Radyo kay Police Major Narciso Sables Jr., Officer-in-Charge sang Sigma Municipal Police Station, iya ginpahayag nga base sa inisyal nga imbestigasyon, nag-abot ang biktima sa ila puluy-an nga yara sa impluwensya sang makahulubog nga ilimnon kag nagpangayo sang kwarta sa iya amay nga nagapahuway sang amo nga tion, apang wala niya ini nahatagan.
Suno kay Sables, ginsunod pa gid sang biktima ang iya amay sang nagwa ini sa ila puluy-an kag nagpangayo gihapon sang kwarta.
Diri na kag may yara sang tension nga natabo kag gilayon nga ginbuno sang amay ang iya bata sang makatatlo ka beses sa nawala nga bahin sang iya ilok..
Gilayon naman nga gindala sa ospital ang biktima apang gindeklar nga Dead on Arrival sang attending physician.
Sa subong, padayon ang hot pursuit operation sang kapulisan batok sa suspek nga nagpalagyo matapos ang insidente.
