ROXAS CITY – Nag-angkon sang pilas sa ulo ang 21-anyos nga lalaki matapos ginlabo sang iya kaugalingon nga amay alas 11:15 kagab-i sa Barangay Sta. Teresa, Dumalag, Capiz.
Ginkilala ang biktima nga si alyas Junjun, samtang ang ginapahayag suspek amu ang amay sini nga si alyas Hermie, 53-anyos kag lunsay mga residente sang nasambit nga lugar.
Sa impormasyon nga nakuha sang Bombo Radyo nagikan sa Dumalag Municipal Police Station, ginapahayag nga ang biktima kag ang utod sini ang nagpauli sa ila balay halin sa ilimnan. Naakig naman ang Amay sini kag diri nagluntad ang pagbinaisay sa tunga sang biktima kag sang iya kaugalingon nga amay.
Bangud sa kaakig sang amay sa iya bata, iya ini ginlabo rason nga nag-angkon sang pilas sa ulo ang biktima nga madasig naman nga ginrespondihan sang Dumalag Response Team kag ginpadangat sa Tapaz District Hospital para sa nagakaigo nga pagbulong.
Samtang madasig naman nga nagpalagyo ang amay sini nga suspek matapos nakumiter ang krimen.
Sa karon nagapadayon pa ang imbestigasyon sang mga kapulisan angut sa nasambit nga insidente.
