ROXAS CITY – Nagdangop sa Bombo Radyo ang anak sang isa ka Person Under Investigation (PUI) nga napatay sa Roxas Memorial Provincial Hospital samtang ginahulat ang resulta sang real-time polymerase chain reaction (RT-PCR) test agud ireklamo ang ginaalegar pagpamilit sang nasambit nga ospital nga ipa-cremate ang iya amay.
Suno sa wala na nagpakilala nga anak nga residente sang Sitio Sacop, Barangay Culasi, gindala nila ang iya amay sadtong Agosto 10 sa amo nga ospital matapos nga nagpin-ot ang dughan sini.
Suno sa iya nga nag-positibo sa rapid test ang iya amay rason nga ginkuhaan man ini sang swab sample para sa RT-PCR test kag ginpakamaayo nga i-confine sa COVID-19 ward.
Apang sang bag-o pa lamang nahalin sa hulot ang iya amay, ginbawian man ini sang kabuhi.
Ginareklamo sang anak bangud sang halin sa emergency room, ginkakas ang oxygen sang iya amay kag gindala sa ward kag didto na ini gintakod liwat.
Isa pa ini sa ginalantaw sang anak nga rason sa pagkamatay sang iya amay magluwas pa suno diri sa atrasado nga pagtatap sa iya amay.
Sa karon suno diri nga luyag kuntani nila ihaya sa ila balay ang iya amay bangud wala pa man makompirmar nga positibo gid ini sa COVID-19.
Apang nagapamilit suno diri ang RMPH nga gilayon na nga i-cremate ang iya amay.
Gindugang pa sini nga nakahanda man sila magsunod sa panugyan sang ospital sa tion nga magguwa ang swab result sang amay kag mapamatud-an nga positibo ini sa COVID-19
