Hugot nga ginpanginwala sang 19-anyos nga soltero nga may partisipasyon ini sa pagbuno kag paglabo-patay sa anay kapitan sang Barangay Mangoso, Sigma kag barangay tanod sang damlag lang.
Nahibaluan nga nagsungka kay barangay kagawad Oki si Christian Belarmino, isa sa tatlo ka mga suspek nga ginatudlo responsable sa kamatayon nanday ex kapitan Isidro Jeroso Sr. kag barangay tanod Mario Marzan.
Ba-se sa panaysayon ni Christian nga gikan ini sa computer shop kag pag-abot sa balay buot na nga magpanghilam-os sang may naghaboy sa ila balay.
Nag-untat sa pag-inum ang iya amay nga si Crisaldo Belarmino kaupod ang anum ka mga kaupdanan kag sang ginbantayan ila nakita si Marzan nga may bitbit nga sanduko.
Sa pihak nga ginsaraduhan nila ang ila nga gate apang ginbuksan ini ni Marzan rason nga nakasulod sila.
Ginpalapitan ni Crisaldo si Marzan, apang hinali siya nga ginhampak sang butong sa ulo rason para ini ang matumba kag malipong.
Ginpanginwala man ni Christian nga ginpunggan niya si Marzan para makabalos ang iya amay.
Ang matood diri suno kay Christian nga ginbuligan lamang sini patindog ang amay nga nalipong matapos lampusan sang butong ni Marzan.
Matapos ang insedente gilayon siya nagbiya sa ila balay kaupod ang mga manghod.
Samtang ang iban nga mga kaupdanan sang iya amay ang nagpauli matapos ginhaboy sang bato ang balay sang pamilya Belarmino. Nahibaluan nga ginpasakaan na sang panumbungon nga homicide sanday Crisaldo Belarmino nga naka-hospital arrest sa karon, ang nagsungka nga si Christian Belarmino kag ang at-large nga si Antonio Villan.
