ROXAS CITY – Nagpamatuod ang isa ka barangay kagawad nga dalagkuan nga mga personalidad ang yara sa likod sang illegal drag racing ukon palumbaanay sang motorsiklo sa Barangay Banica, Roxas City.
Una diri, ginklaro ni Barangay Kagawad Cesar Bulquerin sang Barangay Bato nga indi na sakop sang ila barangay ang lugar kun sa diin ginapatigayon ang ilegal nga aktibidad kundi sakop pa ini sang Barangay Banica.
Ginpahayag ni Bulquerin nga indi matapna ang nasambit nga problema bangud sa tagsa ka magresponde ang mga kapulisan, nagapalagyo man ang mga nagapatigayon sang amo nga aktibidad.
Apisar wala niya ginhingadlan, ginpahayag sini nga anak mismo sang pila ka mga pulitiko ang promotor sang nasambit nga aktibidad kag mga dalagkuan.
Bangud diri, nagapanawagan si Bulquerin sa mga kapulisan kag sa opisyales sang Barangay Banica nga bululigan nila nga matapna ang amo nga problema.
Sa pihak nga bahin, nahibaluan pa sa dugang nga pagpanalawsaw sang Bombo Radyo nga indi magnubo sa P100, 000 ang tay-anay sa nasambit nga aktibidad kag ginaalegar nga may mga kapulisan pa nga nagataya diri.
