Ginpamatukan sang Anakbayan ang pagpalawig sa lima ka tuig nga termino sang mga barangay kag Sangguniang Kabataan (SK) officials.
Ini kasunod sang pag-aproba sa third kag final reading sang Senate Bill No. 2387, nga nagatuyo nga palawigon ang termino sang mga barangay kag SK officials.
Sa interview sang Bombo Radyo kay Matt Gonzaga, National Vice President for Visayas sang Anakbayan, iya ginpahayag nga ginakwestyon nila ang pila na ka beses nga postponement sang BSKE, pati na ang dugang nga pagpalawig sang termino sang mga nagapungko nga opisyal.
Suno kay Gonzaga, mahimo ini mangin injustice sa mga botante bangud ginakuha sa ila ang kahigayunan nga makapili sang bag-o nga mga lider sa barangay kag SK.
Ginpahayag man sini nga kon kinahanglan ang continuity sa pagdumala, dapat sa gihapon nga magpatigayon sang eleksyon agud mahibaluan kon may bag-o nga mandato ang mga nagapungko nga opisyal.
