ROXAS CITY – Ginpasakaan sang criminal complaint sanday anay Pilar Mayor Gideon Ike Patricio, anak sini nga si incumbent Sangguniang Bayan (SB) member Mitchelle John Patricio, kag ang mag-asawang nga sanday Leonard Fernandez kag Ma. Paz Patricio-Fernandez sang Barangay Poblacion, Pilar, Capiz sa Office of the Ombudsman Visayas.
Kaundan sang kinse ka panid nga complaint ang paglapas sang nasambit nga mga indibidwal sa Republic Act 3019 ukon Anti-Graft and Corrupt Practices Act, Swindling kag Falsification of Public Document sa idalom sang Revised Penal Code.
Maliban pa diri, ginpasakaan man sang administrative charges ang mag-amay nga sanday Gideon kag Mitchelle bangud sa Gross/Grave Misconduct, kag Conduct Prejudicial to the interest of the Service.
Nag-ugat ang reklamo sang natukiban sang Transparency and Accountability Task Force sang nasambit nga banwa nga may iregularidad sa donation sang duta sang mag-asawa nga Fernandez sa lokal nga gobyerno sang Pilar.
