ROXAS CITY – Gintawag nga butigon sang anay barangay secretary sang Barangay Milibili, sining syudad si Punong barangay Annabelle Roxas kasunod sang nangin alegasyon sini nga wala nakapasakup ang ila barangay sa Lupong Tagapamayapa Incentives award sang DILG, bangud sa kapaslawan sang nagligad nga administrasyon nga ginapamunuan ni anay kapitan kag karon city councilor Midelo Ocampo nga ma-turn over sa ila ang mga dokumento nga kinahanglanon para sa amo nga kumpetisyon.
Ginpahayag ni Melchor Duran nga wala sang kamatuoran ang mga ginpangbuy-an nga pahayag sang nagapungko nga kapitan sang Barangay Milibili, bangud kumpleto ang tanan nga mga dokumento nga nasulod sa filing cabinet sang barangay secretary sa barangay hall.
Apang nagapati si Duran nga alibi na lamang ini sang punong barangay bangud ang matood nga wala sang handum ukon plano ang karon nga administrasyon nga magpasakup sa anuman nga programa sang DILG.
Ginpanindugan pa sini nga sadto nakabuhi sang tinaga si Roxas nga mabudlay kag magasto gali ang proseso sang pagpasakup sini.
Wala man nalikawan nga makabuhi sang tinaga si Duran nga kun wala lamang nagdikit ukon nag-upod si Roxas kay Ocampo, wala man ini mangin number 1 barangay kagawad.
Kasubong nga ginpakanubo man ni Duran ang educational attainment sang mga ginpili ni Roxas nga nagtal-us sa iya posisyon, bangud wala man sila sang nahimo agud mapadayon ang maayo nga nasuguran kag nalab-ot sang nagligad nga administrasyon sa pagpamuno sadto ni anay kapitan kag karon City Councilor Ocampo nga nagdala sang kadungganan sa ila barangay kag naghatag sang maayo nga serbisyo sa mga pumuluyo.
Ginpabugal sini ang kaugalingon nga bisan indi mataas ang educational attainment apang nangin presidente ini sang asosasyon sang mga barangay secretary sa syudad.
Ginklaro pa ni Duran nga indi mabudlay ang proseso sa pagpanerbisyo kag sa ila pagpasakup sa Lupong Tagapamayapa Incentives award, bangud ang importante lamang nga sundon ang guidelines kag checklist nga ginahatag sang DILG.
Samtang nagpanugyan ini kay Kapitan Roxas nga sa baylo magbuhi sang wala kamatuoran nga estorya, mas maayo nga magmove-on na lamang kag atubangon ang responsibilidad sa ila barangay.
Kuntani tinguhaan man sini nga bisan tunga lamang sa nalab-ot ni Konsehal Ocampo, malab-ot man sini sa iya pagdumala sa ila barangay.
