Nagpamalabag si anay Court Sheriff Abe Andres matapos gin-alegar ginlakip ini sa listahan sang mga testigo nga ipresentar sa impeachment trial batok kay Vice President Sara Duterte.
Si Andres amo ang anay court sheriff nga nangin headline matapos gintampa ni VP Sara sang alkalde pa ini sang Davao City.
Sa isa ka post sa Facebook sadtong Biernes, Hunyo 26, ginpahayag ni Andres nga indi na siya dapat mag-intra sa anuman nga bagay may kaangtanan sa “Partisan politics.”
Ginpahanumdom man sini nga sa subong nagaserbe siya bilang Human Resource Management Officer sa Korte Suprema kag bilang second-level official, nagakabagay lang nga magpabilin siya nga wala sang ginapasulabi sa mga bagay-bagay sang pulitika.
Suno kay Andres, madugay na sini nga ginpili nga indi maghatag sang ano man nga pahayag angut sa insidente nga iya nadalahig, kag bastante na ang mga report sang media angut diri.
Suno sa prosecution team, importante ang testimonya ni Andres agud suportahan ang ila argumento nga may ikasarang ang bise presidente sa paggamit sang kalakasan.
