ROXAS CITY – Nadugangan pa ang numero sang mga professionals nga nagdangop sa estasyon sang pulisya matapos ginaalegar nabiktima sang isa ka investment scheme.
Sa pagpanalawsaw sang Bombo Radyo Roxas, dugang nga 17 ka mga indibidwal ang nagpadulong sa Roxas City Police Station agud ipalab-ot ang kapaslawan sang nag-recruit sa ila nga mabalik ang ila nga gin-invest nga kwarta sa FOREX investment scheme.
Ginatudlo nga recruiter ang anay empleyado sang Bureau of Internal Revenue (BIR) nga si Lourdes Baarde, 41 anyos sang Barangay Baybay, Roxas City.
Nagganyat nga mag-invest sang kwarta ang mga miyembro bangud sa ginatanyag nga 20 percent kada bulan pinaagi sang pag-isyu sang post dated check depende sa terms sang investment.
Apang wala nabalik ni Baarde ang return of investment (ROI) sang mga biktima mangin ang ila nga kapital.
Sa karon, halos 50 ka mga indibidwal na ang nabiktima sang nasambit nga investment scheme kag ginalauman pa nga madugangan ini bangud ginapahayag indi magnubo sa 200 ka mga indibidwal ang nag-invest sang kwarta sa nasambit nga investment scheme.
Nahibaluan nga kadamuan sa mga investor ang lunsay mga negosyante, empleyado sang gobyerno kasubong sang Department of Education, Philippine National Police, Local Government Unit kag ang iban naman ang yara sa private sector.
Anay empleyado sang BIR ginatudlo yara sa likod sang investment scheme sa Capiz; nagparekord nga mga biktima nadugangan pa
-- ADVERTISEMENT --
