Nagapanindugan ang anay empleyado sang Capiz Provincial Capitol nga may bastante nga basehan ang iya reklamo sa Ombudsman batok kay Governor Fredenil “Oto” Castro kag iban pa nga opisyal sang Kapitolyo.
Matandaan nga ginmanduan sang Office of the Ombudsman-Visayas sanday Castro, Vice Governor Jaime Magbanua, Provincial Administrator Atty. Arthur John Biñas, Provincial Legal Officer Atty. Ma. Leobeth B. Deslate-Delicana kag Sangguniang Panlalawigan Secretary Zoe Herrera nga magsabat sa reklamo ni Fernando Garcia.
Sa interview sang Bombo Radyo kay Fernando Garcia, complainant, nag-ugat ang iya reklamo sa pag-hire sang 14 ka pribado nga abogado bilang consultants sang Kapitolyo sadtong 2022.
Ginkwestyon man niya ang pagkuha sang mga abogado bangud may yara na sang tatlo ka abogado sa Provincial Legal Office nga suno sa iya may regular nga katungdanan kag ikasarang sa legal nga responsibilidad sang probinsya.
Base sa mga dokumento nga ginsumiter ni Garcia, nagabaton ang mga pribado nga abogado sang P20,000 tubtob P50,000 nga bulanan nga bayad para sa ila serbisyo.
Sa kabug-usan, ginabanta nga naggasto ang provincial government ang P1.885 millon para sa serbisyo sang 14 ka pribado nga abogado bilang consultants sa sulod sang Calendar Year 2022.
