ROXAS CITY – Mabaskog nga nagapanawagan ang isa sa mga anay health worker sang Mambusao District Hospital sa talatapan nga kung mahimo, i-release na sa ila ang Health Emergency Allowance (HEA) bangud yara naman ang pondo para diri.
Sa interview sang Bombo Radyo kay alyas Jay-R, ginpahayag sini nga sa ila ihibalo nakabaton na sang HEA ang mga active kag regular employees sang amu nga ospital sadtong Hunyo 10.
Mahibaluan nga masobra 5 ka tuig nga nagtrabaho si alyas Jay-R sa amu nga ospital.
Suno diri, 48 sila tanan nga mga casual nga empleyado ang wala pa makabaton sang tig-P54,000 nga ayuda.
Palamangkutanon man sa karun para sa ila nga daw kaangay ginapa-awat-awatan ang pagproseso sang ila mga papeles apisar nga kompleto naman sila sini.
Panawagan sini sa tagdumalahan nga kun tani hatagan man sang pagtamud ang ila ginahinyo bangud dako ini nga bulig para sa ila ilabi na nga wala ini sang trabaho subong.
