BOMBO ROXAS – Ginkalain sang buot ni anay Punong Barangay Ronaldo Arroyo ang wala pagpahanugot ni Punong Barangay Ferdinand Bacanto nga makasulod sa nasambit nga barangay ang pamilya sini nga makabig nga mga Locally Stranded Individuals (LSI).
Sa interview sang Bombo Radyo Roxas kay Arroyo nga may yara ini sang tatlo (3) ka mga himata nga nagikan sa Metro Manila kun sa diin nagtakup na ang pagpaidalum sa 14-day quarantine period sa Municipal Quarantine Facility sang nasambit nga banwa apang wala ginpahanugutan ni Bacanto nga makapauli sa nasambit nga barangay bangud sa ginapahayag indi mga residente sang lugar.
Hugot man nga gindepensa ni Arroyo nga tumandok sang nasambit nga barangay ang mga himata sini apang naglawig lamang sang walo ka tuig sa Metro Manila bangud didto nakapangita sang trabaho.
Suno diri nga nagnegatibo sa COVID-19 ang resulta sang RTPCR Test sang mga himata sini rason nga wala sang dapat kahangawaan si Bacanto.
Dugang pa sini nga nagapabilin sa karon sa isa ka payag sa isa ka kampo sa nasambit nga banwa ang tatlo sini ka mga himata.
Ginpangabay lamang sini nga kun tani hatagan na sang permiso ni Bacanto nga makasulod sa Barangay Culilang ang tatlo ka mga LSI’s agud makaupod ang ila mga pamilya.
