Nagapati ang isa ka anay kongresista nga nagakadapat nga mag-agi sa husto nga proseso ang ginaduso nga mosyon ni Senator Rodante Marcoleta nga magtugot sa mga Senador nga magtambong online sa plenary session.
Sa interview sang Bombo Radyo kay Mr. Raoul Manuel, Karapatan National Council Member, iya ginpahayag nga tuman ka komplikado ang nasambit nga mosyon rason nga kinahanglan nga tun-an sang maayo kag hatagan sang oras antes nga desisyunan.
Suno kay Manuel, kinahanglan nga mag-agi anay sa Committee on Rules ang nasambit nga proposal antes ini idiretso sa plenaryo sang Senado.
Pahayag pa niya, kun tugutan ang amo nga mosyon, posible nga maabuso ang mga justifiable reasons sa pag-absent kag mahimo makaapekto sa kabug-osan sang mga sesyon, ilabi na sa importante nga boto lakip na ang impeachment trial ni Vice President Sara Duterte.
Nagalaum man ang natungdan nga magaboto ang mga Senador base sa ila konsensya kag indi sa impluwensya sang pila ka mga grupo ukon indibidwal.
