Nagapati si former ACT Teachers Party-list Representative France Castro nga importante nga mag-atubang si Mary Grace Piattos sa impeachment trial ni Vice President Sara Duterte agud masabat ang mga isyu nga ginatuhoy sa iya.
Sa interview sang Bombo Radyo kay Castro, iya ginpahayag nga isa ini ka positibo nga tikang kun mapaatubang si Piattos sa Senado sa tion nga magsugod ang impeachment trial.
Suno sa iya, madamo pa ini sang kinahanglan nga sabton nga mga pamangkot, ilabi na ang may kaangtanan sa mga acknowledgement receipt nga may pangalan ni Mary Grace Piattos.
Pahayag pa sini, magluwas sa posible nga pagtambong ni Piattos, ginapaabot man nila ang desisyon sang Senado kon sin-o ang mangin presiding officer sang impeachment court, kag kon magatambong man ang bag-o nga minority bloc sa nagapadayon nga proseso.
Dugang pa sang natungdan, importante nga mangin transparent kag patas ang pagdumala sang impeachment trial agud mapabaskog ang pagsalig sang publiko sa proseso kag sa mga institusyon sang gobyerno.
