Ginpamatbatan sang International Criminal Court ukon ICC ang anay lider sang Seleka militia nga si Mahamat Said Abdel Kani sa ila kaso sang crimes against humanity sa Central African Republic.
Natukiban nga may kahilabtanan si Said sa paghingabot kag pagpaantos sa mga tawo nga ginasuspetsahan supporters ni anay President Francois Bozize sa Bangui.
Suno kay Presiding Judge Miatta Maria Samba, ginpangunahan ni Said kag iban pa nga mga kaupdanan ang pagpang-atake kag pagpaantos sa mga gin-detain bilang kabahin sang plano nga targeton ang mga ginakabig nga kaalyado sang anay presidente.
Ginpamatbatan siya sang apat ka kaso sang crimes against humanity, lakip na ang persecution kag torture.
Apang, ginbasura sang mga mahistrado ang pila ka war crimes charges pagkatapos nga natukiban nga natapos na ang inaway sang matabo ang pila ka mga krimen.
Hugot nga ginpanghiwala ni Said ang tanan nga alegasyon batok sa iya kag wala nagpakita sang reaksyon samtang ginabasa ang desisyon.
