ROXAS CITY – Madugay na nga hiligut-anon, ang ginalantaw nga motibo sa pagpangbuno sang Barangay Tanod sa binaylihan sa Barangay Angub, Cuartero Capiz sang damlag lang.
Sa interview sang Bombo Radyo kay PCAPT. Alladen Talaban
hepe sang Cuartero Municipal Police Station, ginpahayag sini nga yara sa impluwensya sang makahulubog nga ilimnon ang biktima sang nagpadulong sa binaylihan kag sang ginsuway ini sang suspek wala nagpati kag didto na may nagluntad nga indi pag-intindihanay sa tunga sang suspek kag biktima rason nga nabun-an ini.
Mahibaluan nga ginkilala ang biktima kay Johnny Cayanan, 47-anyos, residente sang Barangay Sto. Niño, Dumalag Capiz, samtang ang ginapahayag naman nga suspek ang ginkilala kay Raul Dequiña, 50-anyos, nga residente sang Barangay Angub, Cuartero Capiz.
Suno kay Talaban, nag-angkon sang pilas sa dughan kag tyan ang suspek nga madasig naman ginrespondihan sang katapo sang Cuartero Emergency Response Unit (CERU) agud dapatan sang pauna nga pagbulong antes ginpadangat sa Dao District Hospital para sa nagakaigo kun tani nga pagbulong apang gintransfer ini sa Roxas Memorial Provincial Hospital agud ma-operahan.
Samtang, desidido naman nga magpasaka sang kaso ang pamilya sang biktima batuk sa suspek.
Sa karun, padayon pa nga ginabulong ang biktima kag ang suspek naman yara sa kustodiya sang Cuartero MPS para sa nagakaigo nga disposisyon.
