-- ADVERTISEMENT --

Ginpahayag ni Atty. Paolo Panelo, legal spokesperson ni Vice President Sara Duterte, nga nakabaton ang Bise Presidente sang mensahe nga nagapangayo sang bulig kag pagluwas halin sa account sang isa niya ka anay household staff member sang alas-11:19 sang gab-i, Nobyembre 16, 2026.

Suno sa salaysay ni Panelo, nakasaad sa mensahe nga yara sa kustodiya ukon kontrol sang pila ka indibidwal sa Manila ang nasambit nga anay empleyado matapos ini hambalan nga may yara sang peligro sa iya kabuhi, ginapilit man kuno ini nga magpirma sa isa ka dokumento nga iya ginbalibaran.

Ginkumparar sang legal spokesperson ang nasambit nga insidente sa natabo kay Jefry Tupas sang Setyembre 29, 2026, kun sa diin ginsilingan man kuno ini sang mga ahente sang National Bureau of Investigation (NBI) nga may yara sang banta sa iya kabuhi kag gintinguhaan nga dal-on sa Manila.

Ginpahayag ni Panelo nga may kaangtanan ang duha ka insidente bangud pareho nga may alegasyon sang paggamit sang banta sa kabuhi agud mapilit ang isa ka indibidwal nga mag-upod ukon magsunod sa ginahimo sang iban.

Sa subong, suno kay Panelo, wala pa nila nahibaluan ang eksakto nga nahamtangan sang anay household staff member kag wala pa man makumpirmar ang iya aktuwal nga kondisyon.

-- ADVERTISEMENT --

Nagpahayag sang pagkabalaka ang kampo ni Duterte kag gin-akusaran ang administrasyon ni Presidente Ferdinand Marcos Jr. nga ginagamit kuno ang mga institusyon sang gobyerno, lakip na ang NBI, agud hadlukon kag piliton ang pila ka indibidwal nga mangin mga testigo batok sa Bise Presidente.

Dugang pa ni Panelo, ginapatihan sang kampo ni Duterte nga posible nga may yara sang paninguha nga magkuha sang mga testigo nga magahatag sang indi matuod nga testimonya agud masuportahan ang mga kaso nga ginapasaka batok sa Bise Presidente. Apang, ini ang alegasyon sang kampo ni Duterte nga wala pa napamatud-an.

Bangud sini, nanawagan si Panelo sa publiko, media kag sa nagakaigo nga mga institusyon nga hatagan sang pagtalupangod ang nasambit nga insidente, ilabi na ang mga alegasyon sang pagpanghadlok kag pagpamilit sa mga indibidwal.

Ginpabug-atan man niya ang kinahanglanon nga gilayon nga mahibaluan ang kinaroroonan sang anay household staff member kag masiguro ang iya kaluwasan kag kahilwayan.

Sa iya pahayag, gin-akusaran ni Panelo ang gobyerno nga nagagamit sang mga ahensya sang estado para sa politikal nga katuyuan, nga suno sa iya nagapaluya sa pagsunod sa layi kag nagahatag sang peligro sa mga kinamatarong sang mga indibidwal.

Ginpangabay man sang kampo ni Duterte nga imbestigaran ang nasambit nga mga alegasyon agud mapat-od ang kamatuoran kag masiguro nga wala sang bisan sin-o nga ginapilit ukon ginahulga agud maghatag sang testimonya batok sa Bise Presidente.