ROXAS CITY – Posible nga may kaangtanan sa anay nga kaso sang 33 anyos nga babayi ang rason sa pagluthang-patay sa iya sa Barangay Rizal, Makati City sang Nobyembre 28.
Sa interview sang Bombo Radyo Roxas kay Punong Barangay Alfredo Villanueva sang Barangay Gabuan, Roxas City – ginkumpirmar sini nga anay drug surrenderee ang biktima nga si Mary Jennel Solis nga residente man sang nasambit nga lugar apang temporaryo nga nagaistar sa Makati City.
Suno kay Villanueva, anay na nga nadakpan sa ginkasa nga drug buybust operation sang mga katapo sang Philippine Drug Enforcement Agency (PDEA) si Solis sang Disyembre 10, 2017 sa Barangay Banica sining syudad.
Ginpahayag pa ni Villanueva nga naka-avail sang Plea Bargaining Agreement si Solis kabangdanan nga nahilway ini sa karsel.
Dugang pa sang opisyal nga si Solis ang kabangdanan kun ngaa wala gilayon sadto anay nadeklarar nga drug-cleared ang nasambit nga barangay bangud na-monitor ang biktima nga padayon sa pagduso sang iligal nga droga.
