Madugay na nga ginareklamo sang pila ka pumuluyo ang anay nga tanod nga nakuhaan sang ginasuspetsahan nga droga kag armas-luthang matapos ang gin-implementar nga search warrant sang Maayon PNP sa Sitio Kapul-an, Barangay Manayupit,Maayon Capiz.
Ini matapos ginkumpirmar ni Kapitan Romero Borres, Punong barangay sang nasambit nga lugar sang napakig angutan sang Bombo Radyo. Nahibaluan nga nakuha sa posesyon sang akusado ang 1 ka unit sang 12-gauge shotgun, 2 ka bala; 1 ka unit sang caliber .38 revolver; kag 12 tanan ka sachets sang ginapatihan shabu nga ginabulubanta may kabug-aton 10 gramos.
Matandaan nga ginkilala ang persona kay alyas Tilog nga residente sa nasambit nga barangay. Suno kay Borres, anay na nga drug surrenderee ang amo nga nadakpan kag duwa ka tuig ini nagserbe sa ila barangay bilang barangay Tanod.
Ginpahayag naman sang mga kapulisan, wala naman sang ginpakita nga dokumento ang akusado angut sa nakita sini sang mga otoridad sa nasambit nga armas-luthang.
Magapangatubang ini sa kaso nga Republic Act 10591 ukon Comprehensive Firearms and Ammunition kag Regulations Act 9165 ukon Comprehensive Dangerous Drugs Act of 2002.
Sa karon, nagapabilin ini ang nadakpan sa kustodiya sang Maayon MPS para sa nagakaigo nga disposisyon Samtang, panugyan ni Borres nga wala untat naga monitor ang kapulisan pati sila nga mga brgy. Opisyal agud mapabilin nga malinong kag mangin matawhay sang palibot sang ila brgy.
