ROXAS CITY – Ginapanindugan sang anay provincial administrator nga si Michelle del Rosario nga wala nila gindala sa ila pagbiya sa kapitolyo probinsiyal ang records sang mga approved Aksyon-Agad scholars.
Ginhimo ni del Rosario ang pahayag bilang reaksyon sa mga akusasyon ni Provincial Administrator Dr. Edwin Monares nga indi maproseso kag masolusyunan ang problema sa scholarship program bangud wala sila sang kopya sang listahan ukon records.
Ginpahayag ni del Rosario nga ila ginbilin ang tanan nga dokumento kag records sa kapitolyo bangud bawal nga dalhon ini.
Gindugang sini nga ba-se sa ila staff nga gin-reassign sang Contreras administration sa Tourism Office nga ila na ginhatag ang approved list sang mga scholars sa gobernador sang probinsiya.
Gani ginakatingala ni del Rosario nga pilit ginapangita sa ila ang nasambit nga records.
Samtang aminado si del Rosario nga ila gin-asikaso ang enrollment sang pila ka mga scholars nga nakasumiter sang statement of account nga gikan sa mga eskwelahan sa diin direkta ini nga nagakadto sa mga buluthuan.
