ROXAS CITY – Ginklaro sang anay Provincial Planning and Development Officer sang gobyerno-probinsiyal ang matuod nga rason sang iya pagpanaog sa iya nga posisyon.
Suno kay Stephen Bediones, wala sang kamatuoran ang nagalapta nga impormasyon nga nagbiya siya sa amo nga posisyon bangud naipit ini sa tunga sang executive kag legislative department sang gobyerno-probinsiyal bangud sa isyu sang wala pa mapasar nga Annual Investment Plan (AIP) 2020.
Ginpahayag sini nga nagpanaog siya sa pwesto agud mabuslan sang para sa iya mas kwalipikado para sa amo nga posisyon.
Mahibaluan nga ginbuslan si Bediones ni Wilar Delos Santos samtang siya ang nagaserbi na karon nga Assistant Planning Officer.
Ginklaro ni Bediones nga nangin Acting Provincial Planning and Development Officer siya sadtong administrasyon ni former governor Vicente Bermejo kag wala na nabawi sa iya ang amo nga posisyon tubtob sang nagbulos si former governor Antonio del Rosario kag karon governor Esteban Evan ‘Nonoy’ Contreras.
Apang bangud nahangpan ni Bediones nga may yara sang mga indibidwal nga mas nagakadapat para sa amo nga posisyon kun sa diin isa diri si Delos Santos, siya na lamang ang mismo nagbiya sa amo nga posisyon.
Suno diri nga indi siya sang kwalipikado sa amo nga posisyon bangud wala ini makapasar sa eksaminasyon sang Professional Regulation Commission (PRC).
Apang ginklaro man ni Bediones nga sa gihapon nakahanda ini sa pagsuporta kay Delos Santos kag sa gobyerno-probinsiyal ilabi na sa pagpaayo pa sang trabaho sang (PPDO).
