Napasakaan na sang kaso ang anay Punong Barangay kag sa subong isa ka barangay kagawad sang duha ka kaso bangud sa pagdala sang armas luthang sa Brgy. VII, Roxas City.
Ang anay kapitan amo si Rolando Luda kag residente man sang nasambit nga Barangay.
Sa interview sang Bombo Radyo kay Police Lieutenant Colonel Rogelio L Tomagtang Jr., Officer in Charge sang Roxas Component City Police Station, iya ginpahayag nga grave threat with the used of unlicensed firearms kag Republic Act 10591 ukon Comprehensive Firearms and Ammunition Regulation Act ang paga-atubangon nga kaso sang nasambit nga kagawad.
Suno kay Tomagtang, maga-isyu sang complaint ang piskalya kon sa diin pagahatagan ini sang kahigayunan nga magsabat sa mga alegasyon batok sa iya.
Pahayag ni Tomagtang, base sa resulta sang verification sang Regional Civil Security Unit 6, wala sang rehistrado ukon legal nga armas nga ginapossess si Luda kag wala man sang rekord sang pag-renew sang iya short firearm.
Matandaan nga ang reklamo ang naghalin sa viral nga video sa social media nga nagapakita nga may dala nga armas-luthang ang barangay kagawad kag gin-alegar nga nagpamahog in sa iya kasilingan.
Apisar nga wala naaktuhan sang mga kapulisan ang insidente, nagpadayon ang imbestigasyon paagi sa ebidensya kag kooperasyon sang complainant, nga ginpasalamatan man sang kapulisan.
