ROXAS CITY – Wala makasalbar sa kamatayon ang anay security guard nga lalaki matapos maaksidente sa ginamaneho nga motorsiklo sa National Highway sang Barangay Bolo, Roxas City.
Ginkilala ang driver kay alyas “Jimboy” 29-anyos samtang ang back rider sini ang ginkilala kay alyas “Keneth” yara sa legal nga pang-edaron kag lunsay mga residente sang Barangay West Villaflores, Maayon Capiz.
Sa impormasyon nga nakuha sang Bombo Radyo Roxas sa lugar, ginapahayag nga nagikan ang biktima sa iya utod sa Barangay Libas, sini nga syudad, kag papauli na kuntani sa banwa sang Maayon kaupod ang angkas sini nga iya pakaisa.
Nahibaluan, nga yara sa impluwensya sang makahulubog nga ilimnon ang mga biktima sang natabo ang aksidente kag ginapahayag nga wala sang suksok nga helmet.
Bangud sa natabo, nag-angkon sang patal nga pilas sa ulo ang driver samtang bagras naman sa magkatuhay nga lawas ang pakaisa sini.
Gilayon naman nga ginrespondehan sang katapo sang Capiz Emergency Response Team (CERT) ang mga biktima agud hatagan sang pauna nga pagbulong antes ginpadangat sa isa ka pribado nga ospital sining syudad.
Apang gindeklarar nga dead on arrival sang doktor si alyas jemboy.
Sa karon, nahaya na ang bangkay sang nasambit nga driver sa ila puluy- an samtang yara na sa istabli nga kondisyon ang pakaisa sini kag nakaguha na sa ospital.
