ROXAS CITY – Gindayaw ni anay senador kag anay DILG secretary Mar Roxas ang interactive lights sa iya nga pagbisita sa siyudad sang Roxas kahapon.
Suno kay Roxas nga tuman kadasig ang pag-uswag sang siyudad subong nga tuig.
Ginakabig man sini nga world class ang interactive lights nga ginpahamtang sa mga landmarks kalakip na diri ang City Hall, Simbahan kag Museum.
Bangud diri, nagapalano si Roxas kaupod ang city government nga madugangan pa sang duag ang siyudad sang Roxas pinaagi sa pagpatigayon sang mga aktibidad sang Roxas City Public Plaza.
Magluwas diri, gindayaw man ni Roxas si City Mayor Ronnie Dadivas sa diin daku ang pagbag-o sang siyudad sa idalom sang iya liderato.
Ginpahayag naman ni Roxas nga wala ini nakapauli sa probinsya sadtong sinadya bangud may yara man ini sang mga hilikuton.
Samtang, tuman naman ang pagpasalamat ni Dadivas kay Roxas bangud sa iya nga pagbisita sa siyudad.
Suno kay Dadivas nga bugal kag honor man sini ang pagdayaw sa iya sang amay sang probinsya sa diin nagpasalig man ini nga himuon niya ang tanan nga masarangan para sa kaayuhan kag kauswagan sang siyudad sang Roxas.
Mahibaluan nga ang nasambit nga interactive lights ang ginpainan sang city government sang minilyon pesos nga pondo.
