ROXAS CITY – Gin-athag ni anay Small Town Lottery Consultant Mr. Alberto Roldan nga may yara sang mga korporasyon nga nagaplano nga magbid ukon mag-apply sang franchise sang STL operation sa probinsya sang Capiz.
Suno kay Roldan nga wala pa sang otorisado nga maka-operate sang STL sa probinsya bangud wala pa sang may ginhatagan sang bag-o nga franchise ang PCSO.
Ini kabaliskaran sa ginapalapta nga balita sang pila ka mga grupo.
Ginpahayag sini nga wala pa sang guidelines nga ginpaguwa ukon ginpapanaog si President Rodrigo Duterte.
Ginkumpirma man sini nga nagbiya na ini sa Five Star Gaming and Entertainment Corporation nga amo ang naga uyat sang franchise sang STL operation sa probinsya.
Ginbuyagyag man ni Roldan nga may 115 milyones pesos pa nga balayaran ang Five Star Gaming and Entertainment Corporation sa Philippine Charity Sweepstakes Office (PCSO) rason nga indi pa ini mahimo nga maka operate sa pihak nga ginbawi na ni Presidente Rodrigo Duterte ang suspension order.
Nagalaom man ini nga sa sulod sang duha tubtob tatlo ka bulan, makabalik na sa operasyon ang STL sa probinsya.
Nahibaluan nga ang STL ang nagaserbi nga palangabuy-anan sang nagaserbe nga sales representatives kag supervisors sa diin may yara sang operasyon sang STL.
Matandaan nga ginpauntat ni Presidente Duterte ang tanan nga PCSO gaming schemes kasubong sang Lotto, STL, Keno kag Peryahan ng Bayan bangud sa korupsyon nga nagahinabo apang ginbawi man sang presidente ang suspension sa Lotto samtang padayon sa gihapon ang imbestigasyon sa iban pa nga gaming corporations.
