ROXAS CITY – Ginalantaw sang isa ka anchorman sa Roxas City nga may kaangtanan sa iya trabaho ang motibo sa tuyo nga pagluthang sa iya samtang sakay sa salakyan sa Barangay Cagay, Roxas City.
Ang biktima amo si Jay Lavapiez , nagatrabaho sa isa ka FM radio station.
Sa interview sang Bombo Radyo kay Lavapiez, iya ginpahayag nga samtang pakadto siya sa iya ginatrabahoan kag nagabahar nga magliko, nakit-an na niya ang duha ka mga lalaki nga yara sa waiting shed kag may ginakuot nga nagadali-dali sa iya paglabay.
Suno sa iya, paglapaw sang iya salakyan, gulpi lang gintiro sang mga suspek ang iya salakyan sa diin naigo ang pwertahan kag may naglusot pa nga bala sa ginapungkoan sang biktima.
Apang nakaluwas si Lavapiez bangud wala ini maigo sa apat ka lupok sang mga suspek.
Ginlaragway sang biktima ang mga suspek nga nagapang-edaron sa 40 tubtob 50 anyos, fair complexion, mataas kag maniwang.
Pahayag niya, base sa mga na-rekober nga apat ka mga bala, posible nga 9mm nga armas ang gingamit sang duha ka mga suspek.
Dugang pa sang natungdan, wala ini sang kontra nga tawo apang indi manigar nga may mga kaso ini nga ginapangatubang bangud sa iya nga trabaho bilang anchorman.
Suno kay Lavapiez, kun nagahambal man lang sang matuod sa kahanginan ilabi na sa mga issue sa sosyudad, wala ini sang dapat nga kakulbaan.
Ang amo nga hitabo pahayag niya, nagahatag sang mensahe sa tanan nga katapo sang media nga may mga tawo nga luyag pahipuson ang mga nagawaragwag sang kamatuoran agud matabonan ang sala nga ginahimo.
