ROXAS CITY – ‘Iskolar sang probinsiya, indi pag gamita sa pulitika’.
Ini ang titulo sang maunod nga diskurso-pribilehiyo ni Board Member Thea Faith Reyes, ang chairman sang Committee on Education sang Sangguniang Panlalawigan.
Ginkwestiyon ni Reyes ang madangatan sang mga estudyante nga scholars sang gobyerno-probinsiyal pananglitan may mga pagabag-uhon ang administrasyon ni Governor Esteban Evan ‘Nonoy’ Contreras.
Nagapati man si Reyes nga ginhimo lamang sang nakaligad nga administrasyon ang nagakadapat para mabuligan ang mga estudyante nga wala sang ikasarang sa ila nga pag-eskwela.
Gintuad man ni Reyes nga kasubong nagasalungkaki ang mga pahayag sang provincial administrator sa public information officer sang gobyerno-probinsiyal natuhoy sa scholarship program sang nakaligad nga administrasyon.
Kuntani suno kay Reyes tun-an sang husto sang bag-o nga administrasyon ang scholarship program bangud nagapati ini nga may nagakaigo nga pondo para diri agud mabuligan ang mga pamatan-on sa ila pag-eskwela.
Sa katapusan, nangin makahas ang mga tinaga ni Reyes sang siya ang nagsiling, mahimo may pamulitika sa natabo karon sa scholarship program sang gobyerno-probinsiyal apang ang bwas damlag sang mga scholars ang indi dapat paglaktan sang pulitika.
