ROXAS CITY – “Ang merkado nga progresibo may basura, ang wala basura nga merkado indi progresibo”.
Ini ang nangin sabat sang Market Administrator sang Teodoro Arcenas Trade Center (TATC) nga si Heloise Mendoza may kaangtanan sa ginapahayag nga mga basura nga nakatambak lamang sa guha sang merkado.
Sa interview sang Bombo Radyo kay Mendoza, ginpahayag sini nga adlaw-adlaw nga ginakolekta ang mga basura apang nagakadelayed lamang ini ilabi na subong nga peak season.
Mahibaluan nga wala sang garbage truck ang merkado kag nakaback-up lamang ang duha ka truck sang City Environment and Natural Resources Office (CENRO) kung sa diin dako nga bulig.
Suno sa administrador, twice a day kung kuhaon ang mga basura kag nakadepende ini kung anu kadamo adlaw-adlaw.
Sa pihak nga bahin, nagpahayag si Mendoza may kaangtanan sa ginpatigayon nga demolished sa mga nagabaligya sa Burgos Talipapa kung sa diin makapila ka beses na ang mga ini ginpatawag sa meeting agud hinalaan ang pag-relocate sa ila sa TATC apang madamo suno diri sa ila ang wala nagtambong.
Pahayag sini nga kung indi ini pagtinguhaan nga himuan sang paagi sang city government wala sang improvement ang civic center kag indi mapatuman ang sidewalk ordinance.
Mensahe ni Mendoza nga magkooperar na lamang sa ila kag bukas sila sa anu man nga mga pamangkot ukon bulig sa mga manugbaligya nga naapektuhan.
