Nagpagwa sang pahayag ang aktres nga si Angel Locsin batuk kay Senador Robin Padilla matapos nga gintawag niya ang iya kaugalingon nga “komunista” sa tunga sang impeachment trial ni Vice President Sara Duterte.
Sa isa ka malawig nga Facebook post, ginpanumdom ni Angel ang mga tinion nga close sila kag ginpahayag nga masami nga ginasugid sa iya ni Padilla ang iya mga inagihan sa paghimakas kag pag-upod sa armado nga hublag.
Suno kay Angel, nadumduman niya ang “anay Robin Padilla” nga iya nakilala bangud sa pahayag sang senador.
Apang ginkwestyon ni Locsin kun nga-a ginaalegar nga naghipos lang si Padilla sang liwat-liwat ini nga gin-red-tag, bisan pa nga nakahibalo kuno ang senador nga indi matuod ang mga alegasyon batuk sa iya.
Ginpahayag man sang aktres nga indi sini maintiendihan ang ginapahayag suporta sang senador kay Pastor Apollo Quiboloy nga sa karon nagapangatubang sang kaso nga Qualified Human Trafficking, Child Abuse, kag iban pa.
Ginkwestyon man sang aktres ang panindugan ni Padilla sa China nga suno sa iya nagasumpakil sa nauna nga imahe sang senador bilang isa ka patriot.
Suno sa aktres, gindayaw niya anay si Padilla bangud sa iya patriotismo, apang nadismaya siya sa pila ka mga pahayag sini angut sa China.
Nahibaluan nga madugay na nga ginapanginwala ni Angel ang mga alegasyon nga may kaangtanan siya sa mga komunista nga grupo matapos siya gin-red tag bangud sa iya humanitarian work kag adbokasiya.
