Ginkoronahan si Angelica Lopez sang Palawan bilang Reina Filipinas Grand International 2026 sa una nga grand coronation night sang pageant.
Si Angelica ang magatiglawas sa Pilipinas sa Miss Grand International 2026, nga magabulos kay Emma Mary Tiglao.
Ginlutos ni Lopez ang 20 ka iban pa nga mga kandidata gikan sa nagkalain-lain nga bahin sang pungsod agud makuha ang titulo.
Si Cleopatra Barrera sang Zambales ang nagdaug sang titulo nga first runner-up, samtang si Isabella Ortega sang Camarines Sur ang second runner-up.
Ginkilala man sanday Zeah Nestle Pala sang Mandaluyong bilang third runner-up kag Luisa Benavides sang Caloocan bilang fourth runner-up.
Samtang, sanday Anne Patricia Diaz sang Manila kag Alexie Caimoso Brooks sang Iloilo City ang napilian nga magrepresentar sa Pilipinas sa masunod nga edisyon sang MGI All Stars matapos nga makuha ang Reina Filipinas MGI All Stars titles.
Ang mga nagdaug ginapili base sa gintingob nga puntos gikan sa panel sang mga hukom kag boto sang publiko.
Kalakip sa mga hurado amo ang internationally acclaimed Filipino designer Michael Cinco, Miss Grand International 2024 CJ Opiaza, inaugural MGI All Stars winner Vanessa Pulgarin sang Colombia, kag first runner-up sang MGI All Stars Nguyen Huong Giang sang Vietnam.
